BIBLIOTECA DE CESPÓN

ACTIVIDADES PAZ 2011

2012-02-05T18:48:00.003+01:00

Poemas, cancións, entrega de marcapáxinas, pins con pombas da paz...foron algunhas das actividades conxuntas realizadas o 30 de xaneiro.

INVERNO

2012-02-03T19:20:00.003+01:00

o alumnado do 2º ciclo a través das familias realizou unha recompilación de poemas, adiviñas, refráns e ditos...relacionados co inverno. Logo, na biblioteca buscaron poemas "As catro estacións" de García Teijeiro, no apartado do inverno proporcionounos moito material. Tamén manexamos libros de información para elaborar un .."Sabías que...? con ideas moi sinxelas do que acontece no inverno. Para colgar, poemas, nubes, gotas de auga, relampos,...empregamos algo moi típico do inverno: un paraugas! Mellor que o vexades!

KARAOKE DA PAZ

2012-01-30T16:55:00.004+01:00

Fixemos un karaoke sobre a canción "Los niños queremos cantar" do grupo 3+2, con fotos do alumnado do centro e actividades colectivas en torno aos dereitos das nenas e dos nenos. CANTADE CON NÓS!

DEREITOS DOS NENOS E DAS NENAS

2012-01-27T19:34:00.004+01:00

Seguimos elaborando actividades para o Día da Paz. Nesta ocasión, cada aula confeccionou unha folla da árbore, destacando un dereito dos nenos e das nenas. Aproveitamos a tarefa para empregar materias de refugallo, para non deixar en olvido o tema da reciclaxe. MOI VISTOSO! OXALÁ OS NOSOS DESEXOS SE FAGAN RELIDADE...

NOVOS FONDOS

2012-01-26T17:48:00.004+01:00

Ao noso Centro os Reis Magos chegaron cun pouco de retraso, pero o importante foi que nos agasallaron con moitas novidades. Os/as colaboradores/as da Biblioteca foron os encargados de levar as caixas de libros aos respectivos ciclos. Ah! Non faltaba unha carta de Luíña contándolle moitas cousas. Agora, dende a Biblioteca desexamos BOAS LECTURAS!

MARCAPÁXINAS DA PAZ

2012-01-25T23:09:00.006+01:00

Para conmemorar o Día da Paz, o Equipo da Biblioteca elaborou estes marcapáxinas. A primeira ilustración sería a parte de diante de todos os marcapáxinas.

NÓS COLABORAMOS!

2012-01-20T19:04:00.008+01:00

Xa temos colaboradoras e colaboradores na biblioteca. E como ata o de agora sempre botamos man dos maiores, neste caso estréase alumnado de 3º de primaria. Están moi ilusionados coa súa tarefa de manter en orde os libros, axudar aos máis pequenos, fixarse na cor dos gomets, ler o nome das editoriais,...CANTO TRABALLO POR DIANTE! Nesta ocasión, grazas David, Alba e Adriana polas ganas de aprender e a ilusión que poñedes!

WEBQUEST: COIDEMOS O PLANETA!

2012-01-15T23:10:00.006+01:00

Esta webquest forma parte do conxunto de actividades realizadas para o proxecto anual da Biblioteca. En concreto estas, están pensadas para o 3º ciclo de primaria. Para realizalas en grande, preme AQUÍ

KARAOKE "XA ME TARDAN"

2012-01-08T20:16:00.003+01:00

Nadal 2011! Presentación "Xa me tardan estes magos". A través do Karafun é un estupendo xeito de memorizar, cantar... e pasalo xenial todos xuntos na Biblioteca. Poema de Gloria Roel e música de Mamá Cabra. Esperamos que aproveitedes todos estes vídeos, que por fin subimos ao blog para cantar en familia. A CANTAR!

KARAOKE "O CUARTO MAGO"

2012-01-08T20:14:00.001+01:00

Presentación do libro: "Xa me tardan estes magos". Neste caso "O cuarto rei mago". A partires de imaxes de internet e outras propias, cantamos o poema de Antón Cortizas coa música de Mamá Cabra. Fantástico!

KARAOKE "WAKA WAKA"

2012-01-08T20:12:00.002+01:00

Proxecto Anual da Biblioteca 2010/2011: "Lecturas e culturas de aquí e de acolá".O alumando de 2º móvese no festival de Nadal ao ritmo do Waka-Waka, facendo un guiño á cultura africana traballada en infantil.

KARAOKE "PIRIMPIMPÍN"

2012-01-08T20:10:00.003+01:00

Este foi dos primeiros temas elaborados co programa Karafun. Foi todo un éxito: elaborado con fotos da contorna e a canción de Malvela, moi coñecida polo alumnado ao ser cabeceira dunha serie da TVG. Elaborouse para rematar o festival de Nadal. O alumnado de diversos cursos prepararon unha coreografía e ao final todo mundo (pais, alumnado, profesorado,...) se animou a cantar e a bailar, non faltando o típico baile agarrado.

KARAOKE "MÁS ALLÁ"

2012-01-08T20:07:00.001+01:00

Impresionantes imaxes collidas de internet. Melodía de Gloria Stefan. Elaborado para commemorar o Día da Paz.

KARAOKE "JAMBO WANA"

2012-01-08T20:03:00.005+01:00

Dentro do Proxecto Anual da Biblioteca 2010/2011: "Lecturas e culturas de aquí e de acolá"elaboramos este vídeo, unha vez feito co programa Karafun. Moitas imaxes están collidas de internet e outras son propias. Esta canción foi acompañada por alumnado tocando os jembés africanos. África era a cultura que se traballou en infantil. Resultou moi interesante e foi toda unha experiencia presentar o suajili, idioma falado, sobre todo, en Tanzania e Kenia.

KARAOKE "O ARCO DA VELLA"

2012-01-04T20:16:00.005+01:00

Este vídeo recolle fotos da campaña "Unha praia limpa, unha praia feliz" levada a cabo nas distintas praias de Boiro. O poema é de Manuel María cantado por Suso Bahamonde.

CONTACONTOS

2012-01-01T18:43:00.008+01:00

O alumando de infantil asistiu na Biblioteca a unha sesión de contacontos. Alumnado de 6º preparou o conto: "O que escoitou a xoaniña". Alumnos e alumnas de 3º: "A que sabe a lúa" "O rato e os ventos".

PRESENTACIÓN CD

2012-01-01T18:33:00.004+01:00

Na semana anterior ás vacacións de Nadal, os distintos cursos pasaron pola Biblioteca para escoitar e cantar co CD: "Xa me tardan estes magos". A través do programa Karafun e a modo de karaoke disfrutamos coas voces de Mamá Cabra e os poemas de Antón Cortizas, García Teijeiro, Gloria Roel, ...

RECOMENDACIÓNS NADAL

2011-12-30T20:10:00.007+01:00

A mascota da Biblioteca, Avelaiona Luíña, recórdalles ás Súas Maxestades de Oriente as recomendacións lectoras para este Nadal.

A RECICLAXE EN CARTACES

2011-12-20T22:07:00.008+01:00

CLUB DE LECTURA: BALA PERDIDA

2011-12-15T21:41:00.006+01:00

Neste club de lectura levado a cabo co alumnado de 6º de primaria queremos propoñer a lectura de libros que conecten cos nosos intereses, que nos emocionen, que nos fagan vivir aventuras, que respondan ás nosas preguntas, que aprendamos divertíndonos, que..., que..., que...tantas cousas que mellor e poñervos xa a ler. Apuntádesvos?

LA GRAN FÁBRICA DE LAS PALABRAS

2011-12-11T18:49:00.007+01:00

Bubisher é o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!! A nosa Biblioteca colabora na campaña proposta polas Bibliotecas Escolares aportando o fermoso libro "La gran fábrica de las palabras"
"Existe un país onde a xente case non fala. Nese estraño país, hai que comprar e tragar as palabras para poder pronuncialas. Diego necesita palabras para abrir o seu corazón á fermosa Aura. Pero, cales elixir? Porque, para dicir o que quere dicir a Aura, necesítase unha fortuna! Non se pode equivocar..." Un texto poético de Agnès de Lestrade, ilustrado co talento e a imaxinación de Valeria Docampo. Un regalo para os ollos e os oídos! Unha oda á maxia das palabras e unha bela historia de amor.

ACTIVIDADE JAVACLIC "A RECICLAXE"

2011-12-10T13:51:00.012+01:00

Realizouse esta actividade javaclic sobre a reciclaxe pensada para o 2º ciclo.
Facela en grande

DÍA DOS DEREITOS HUMANOS 2011

2011-12-10T13:09:00.003+01:00

63 anos despois da súa proclamación, segue sendo necesario lembrar esta data, 10 de decembro, na que a Asamblea Xeral das Nacións Unidas aprobou a Declaración dos Dereitos Humanos.

Necesario porque nin tan sequera nos países que asinaron esta declaración están garantidos estes dereitos en igualdade de condicións para toda a poboación. Non hai máis que botar unha ollada ao noso arredor, asomarse ás noticias.

Mais aínda así cabe pensar que un outro mundo é posible, que hai arrecendos espallados no ar que nos permiten prender unha candea pola esperanza, por estas xeracións, hoxe nen@s, adolescentes, que medran nas nosas aulas, ao abeiro das nosas Bibliotecas -das súas lecturas, da súa información, da súa formación- nen@s e adolescentes que se implican ilusionad@s e con empeño en proxectos coma "Coñecernos para querernos", nun intercambio persoal e de coñecementos con nen@s dos campamentos saharahuis, para quenes a apertura dunha biblioteca con (o Bubisher) ou sen (O Niño do Bubi) rodas, supón moito máis que un mundo de oportunidades. Para acceder á ilusión, aos soños, á formación, ao coñecemento doutras culturas, doutro idioma.

E con esa candea acesa, brincan faíscas que prenden en case un cento de Bibliotecas Escolares Galegas, que por todo o país escollen cada unha un fermoso álbum ilustrado para agasallar a ese recén estreado Niño do Bubi, porque, coma nas nosas propias Bibliotecas, toda inauguración é unha festa. A esa festa que é a lectura, nesas bibliotecas acubilladas na area, queremos enviar estes álbumes como aves portadoras de boa sorte, como bubishers* cheos de cor, imaxes, historias. Porque as nosas bibliotecas, @s nos@s lectores e lectoras, compartimos co Bubisher, cos lectores e lectoras das súas bibliotecas a crenza firme nos Dereitos Humanos, dende o seu 1º artigo: "Tod@s nascemos libres e iguais en dignidade e dereitos"

* O bubisher (Oenanthe leucopyga e Oenanthe leucura) é un paxariño tímido que vive na Península e tamén en África, aquí chamámoslle collalba negra e no Sáhara o seu nome significa paxaro da boa sorte, no dialecto hassaní é Bubchir بوبشير (o da boa nova) porque adoita aniñar e criar despois das choivas, o que quer dicer que medrará a herba, algo moi importante para quen ten gando.

Bubisher é tamén o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!!

Se queredes unirvos á iniciativa de Álbumes para o Bubisher, só tedes que poñer os vosos datos xunto ao resto das Bibes Galegas.

Música e DDHH

Texto de Maribel Serantes (CEIP Os Casais)

Imaxe atopada aquí

PANTASMAS NO ...

2011-12-08T21:50:00.006+01:00

As pantasmas de Agustín Fernández Paz están no corredor. O alumando de 4º púxolle por título ás súas: "Pantasmas no outono".

Aproveitan a ocasión para traballar a reciclaxe, reutilizando follas secas para darlle un aspecto fantasmagórico.

ACTIVIDADES LIM A RECICLAXE

2011-12-03T18:57:00.001+01:00

Dentro do Proxecto Anual da Biblioteca e unha vez pasada a presentación ao alumnado, imos realizar actividades para infantil e 1º ciclo, para demostrar o moito que aprendemos. Adiante! Coidemos o planeta! Nós podemos

CINE

2011-11-28T19:02:00.004+01:00

O alumnado de 6º comezou unha sesión de cine coa visualización da primeira película: Temple Grandin. Aquí podedes atopar todos os datos técnicos da película, así como o argumento, temas paralelos nos que investigaron e as opinións persoais.

HORA DE LER

2011-11-28T17:54:00.002+01:00

Coa finalidade de dinamizar o tempo de lectura elaboráronse estes modelos de fichas. Están pensadas para o 2º ciclo, para ler de xeito colectivo na pizarra dixital e ir razoando e resolvendo as cuestións que se prantexan.

BIBLIOGRAFÍA PROXECTO BIBLIOTECA

2011-11-24T22:01:00.003+01:00

Aquí podemos recordar algúns dos libros cos que estamos traballando no proxecto: Coidemos o Planeta! Nós podemos! Algúns son informativos, outros de lectura, pequenas guías con consellos, ... Algúns destes libros foron contados por alumnado duns cursos a outros. Seguiremos na procura de máis...

VIDEO-PRESENTACIÓN

2011-11-22T00:07:00.013+01:00

Aquí vos deixo o vídeo da presentación do Proxecto anual da Biblioteca: Coidemos o Planeta! Nós podemos! que estes días estamos a traballar nas distintas titorías, guiados da man da nosa mascota Luíña que nos presenta moitas das diapositivas. Xa sabedes que a presentación consta de tres partes: unha explicación de todo o traballo de reciclaxe que estamos levando a cabo entre todos e todas, unhas fermosas imaxes da natureza en contraposición con outras que demostran que o Planeta está enfermo. Notaredes neste vídeo que falta a canción de Huecco "Dáme vida". Abaixo déixovos o enlace. E recordade, MÚSICA E DEPORTE SON AS ENERXÍAS MÁIS LIMPAS! ECOSAÚDOS!

VER VÍDEO DE HUECCO "Dame vida"

OUTONO

2011-11-20T20:37:00.004+01:00

Unha mañá, pitiño pispín
saíu pasear.
díxolle a nube:
"pin-pirin-pín, pitiño pispín
coas miñas pingas heite mollar".
Díxolle o pito:
"teño paraugas,
para as túas pingas:
¡pan-paran -pán!"
Rimas con letras

Traballos do alumnado do 3º ciclo

Open publication - Free publishing - More actividades

ANIMAIS ENCANTADORES

2011-11-10T17:18:00.006+01:00

Na vindeira semana e nos recreos escoitaremos, e como non bailaremos as melodías do libro "Animais encantadores". É un libro de Susa Herrera da editorial "Primerapersona". Ademais das letras impresas e en CD, conta cunhas fermosísimas ilustracións, ten coreografías para cada canción. O alumnado de 6º realizou en plastilina os 10 animais para axudar a presentación deste fermoso libro. Estupenda colaboración que toda a comunidade valora e o alumnado se sente moi motivado. Esperamos que sexa un éxito de asistencia. Xa o sabedes: A CANTAR E BAILAR CON ANIMAIS ENCANTADORES!

PRESENTACIÓN FONDOS

2011-10-25T20:23:00.003+02:00

Comezamos coa presentación de fondos mercados para o Proxecto Anual: Coidemos o Planeta! Nós podemos! Nesta ocasión, Rubén, Carla e Adriana de 3º presentaron os libros: "Elige el verde" e "Capitán Verdemán, superhéroe del reciclaje". Na hora de ler foron ás aulas de 1º e 2º a contarlles as interesantes historias que falan dun mundo verde, sen contaminación, con xentes que reciclan...

OLA, OLA, OLA

2011-10-25T20:19:00.003+02:00

Durante esta semana nos recreos e na Biblioteca presentamos o CD e DVD: Ola, Ola, Ola de Mamá Cabra. Non faltedes! Podemos cantar co karaoke e bailar!

CHEGA O OUTONO AO COLEXIO

2011-10-21T22:26:00.005+02:00

O alumnado de 6º está realizando estupendas obras de arte con materiais do entorno e propios da época outonal. Aproveitan a ocasión para recordar un texto de "Prosas Galegas" de Florentino López Cuevillas.

COMEZAMOS COAS MOCHILAS VIAXEIRAS

2011-10-12T18:29:00.012+02:00

Este fin de semana as mochilas viaxeiras volverán coas familias do noso alumnado de primaria. Estamos preparando os materias para que gocedes escoitando música, consultando os libros de información, lendo o cómic, vendo a película. Desexamos que un ano máis sexa unha actividade do voso agrado e dámosvos xa as grazas pola boa acollida que están tendo, proba diso son os comentarios que nos facedes chegar, ano tras ano, no libro viaxeiro. En breve o alumnado de infantil comezará tamén coas súas mochilas. Boas lecturas!

ADEUS A WANGARI MAATHAI

2011-10-09T22:05:00.005+02:00

"Wangari e as árbores da paz" foi o libro elexido o curso pasado no Día da Paz. Realizamos diversas actividades e falamos da autora. No ano 2004 recibiu o Premio Nobel da Paz pola súa contribución ao desenrolo sostible, á democracia, e á paz. O 25 de abril de 2011 recibiamos a triste nova do falecemento desta activista e ecoloxista keniata. Seguiremos poñendo en práctica as súas ensinanzas, de feito o noso Proxecto da Biblioteca xira en torno ao consumo responsable.

AGUSTÍN FERNÁNDEZ PAZ

2011-09-18T20:38:00.018+02:00

Agustín Fernández Paz recibiu outro novo premio. Aínda que moitos/as de vós o coñecedes quero recordarvos que no ano 2007 estivo no noso centro e mantivo unha conversa co alumnado "No corazón do bosque", "Fantasmas no corredor" "Un tren cargado de misterios" "O laboratorio do Doutor Nogueira",... foran algúns dos libros elixidos para traballar máis polo miúdo. Tamén vos deixo o enlace para recordar aquela estupenda sesión. E seguro que se mirades na Biblioteca atoparedes libros coa adicatoria deste xenial mestre e escritor galego.

Vén de acadar o Premio Iberoamericano SM de Literatura Infantil e Xuvenil que se entregará na Feria Internacional do Libro de Guadalajara (México). O xurado distinguiuno pola "súa extensa obra narrativa, que aborda unha gran diversidade de xéneros e temas".
Dende a Biblioteca de Cespón PARABÉNS, AGUSTÍN!

OLA AMIGOS/AS

2011-09-10T21:03:00.003+02:00

Ola amiguetes! Que rápido pasaron as vacacións! Pero teño que dicirvos un segredo: XA TIÑA GAÑAS DE ESTAR CON VÓS! Deixádeme que lle dea a benvida ao alumnado e profesorado novo. Ah! Que quen son eu? Luíña, a mascota da Biblioteca. Xa nos iremos coñecendo e os nenos dos outros anos de seguro que vos falarán de min.
Quero presentarvos o tema común que levaremos a cabo este curso: "COIDEMOS O PLANETA! NÓS PODEMOS". Como sei que teño seguidores a través do blog, propóñovos que comecemos a recompilar libros de lectura, informativos, películas, láminas,... que teñan relación co tema e os vaides deixando na mesa que atoparedes á entrada da biblioteca.

RECOMENDACIÓNS VERÁN

2011-06-14T22:37:00.001+02:00

Pouco a pouco está chegando o remate do curso. E para non perder o costume de ler, informarnos, pasalo ben... aquí vos deixamos unhas propostas de libros para ler durante o verán. Recordade que algúns deles os podedes atopar na Biblioteca Municipal, así como outros moi interesantes. Agora que xa tés o carné da nosa biblioteca, anímate e faite socio da Biblioteca de Boiro.

REVISTA FALARES

2011-06-06T19:49:00.007+02:00

En poucos día teredes nas vosas mans o novo número da Revista Falares. De tódolos xeitos, premiando a fidelidade dos seguidores/as deste blog, aquí vos deixo a revista en formato dixital.

Open publication - Free publishing - More edu

PREMIOS LITERARIOS "RAMÓN MARTÍNEZ LÓPEZ"

2011-06-05T13:52:00.007+02:00

O resultado do IV certame literario “Ramón Martínez López” celebrado no concello de Boiro neste 2011, demostrou, unha vez máis, a alta participación e calidade dos distintos textos presentados, xa que a organización tivo serios problemas á hora de decantarse polos premiados/as, pois foi moi alta a calidade dos traballos. Este ano, e seguindo con cursos anteriores, o alumnado do CEIP de Cespón expresou o seu gusto pola lecto-escritura participando neste certame, e acadando tres significativos premios.
Categoría A : Sergio Rial Fernández, obtivo o primeiro premio coa obra “Baúl máxico”.
O segundo premio foi para Javier Torrado Martínez, coa obra “O escarabello”
Categoría B: Carlos Piñeiro Vázquez acadou o primeiro premio coa obra “A adopción de Marcos”.
Felicitar a todos/as os/as participantes e organizadores deste evento, significando un pulo importante para a cultura en xeral, e o fomento da lecto-escritura en particular.

O TESTAMENTO DO TÍO NACHO

2011-05-20T21:58:00.005+02:00

O grupo de teatro creado o curso pasado e no que participan pais, nais, conserxe, persoal limpeza e encargada da Biblioteca puxeron en escea "O testamento do tío Nacho" aportando así o seu gran de area ao festival das Letras Galegas. Faltan palabras para eloxiar O labor destas persoas que teñen que combinar horarios, cambiar turnos,... para poder acudir aos ensaios. Está resultando unha actividade estupenda de colaboración familias-colexio e que o alumando valora moi positivamente.

OBRA: "RESTAURANTE FARRUCO"

2011-05-20T21:41:00.005+02:00

O alumnado de 5º representou a obra de Chus Pereiro, ilustrada por Xan López, titulada "Restaurante Farruco". Esta obra, contada en verso, mantivo moi atento ao público. Noraboa aos xeniais actores e actrices!

VIDA E OBRA DE LOIS PEREIRO

2011-05-20T21:28:00.006+02:00

O alumnado do 3º ciclo, como vén sendo costume, realizou tres cartolinas, coa caricatura, obra e vida do autor das Letras Galegas 2011: Lois Pereiro.

LETRAS GALEGAS, 2011

2011-05-17T20:22:00.009+02:00

Seguindo coa tradición do Centro, chegado o mes das Letras elabórase a caricatura do autor homenaxeado, nun prato de polbo a través do pirogravado. Aquí temos a caricatura de Lois Pereiro.

INFANTIL E O MES DAS LETRAS

2011-05-06T20:22:00.005+02:00

Os corredores de infantil están ateigados de carteis, murais, ...onde o alumnado deixa ver as súas pegadas das distintas celebracións: Día do Libro, Letras Galegas,...

LOIS PEREIRO

2011-05-06T20:08:00.005+02:00

O alumnado de infantil escenifica mediante un fermoso tren a chegada do autor homenaxeado este ano no Día das Letras Galegas: Lois Pereiro.

TRÍPTICO LETRAS GALEGAS

2011-05-06T19:58:00.005+02:00

O equipo de Normalización e Dinamización Lingüística do centro xunto coa Biblioteca elaboraron un tríptico para enviar ás familias onde, entre outras cousas, se manda información sobre a vida e obra de Lois Pereiro, se presenta a XI Semana Cultural e se lles invita a participar na campaña "Salvar un libro".

SALVANDO LIBROS!

2011-05-06T19:43:00.007+02:00

O alumnado de 3º realizou unha Luíña (a nosa mascota) para salvar os seus dous libros: "Orión e os animais magos" e "Os soños na gaiola" de Manuel María. FERMOSO TRABALLO! PARABÉNS!

VISÍTANOS O ILUSTRADOR ABRAHAM CARREIRO

2011-05-05T22:13:00.006+02:00

O alumnado do 1º ciclo recibe a visIta do ilustrador Abraham Carreiro. Estivemos lendo libros da colección "Contos que len outros nenos do mundo" da editorial A Nosa Terra: A pel de crocodilo, As espiñas do porco espiño, ...As nenas e os nenos quedaron moi sorprendidos coa xenial mestría á hora de crear os personaxes. Logo, realizou co alumando un obradoiro para debuxar distintos tipos de animais: aves, animais de catro patas, peixes,...Actividade moi positiva e satisfactoria, proba disto son as caras de admiración que podemos observar no alumnado.

SEGUIMOS SALVANDO LIBROS

2011-05-05T17:55:00.006+02:00

Cada clase salvou dous libros: Lobo Feroz, O Papón, ...Agora vén o máis difícil: temos que salvar só un deles. Pois nesas andamos! pero mentras tanto, aquí vos deixamos imaxes:

XI SEMANA CULTURAL

2011-05-04T22:31:00.003+02:00

Na vindeira semana, do 9 ao 13 de maio celebraremos a XI Semana Cultural. Contacontos, obradoiros, xogo de pistas, xincanas, cine, charlas, obras de teatro, baile rexional...serán algunhas das actividades propostas para levar a cabo.

AGARDANDO A ABRAHAM CARREIRO

2011-04-28T17:31:00.008+02:00

Mentres agardamos polo día 5 de maio, día que nos visitará Abraham Carreiro, o alumnado do 1º ciclo estamos lendo contiños da colección "Contos que len outros nenos do mundo" da editorial A Nosa Terra, ilustrados por el. Hoxe tocou facer actividades na pizarra dixital sobre "As espiñas do porco espiño"

DÍA DO LIBRO

2011-04-28T17:23:00.004+02:00

Unimos dúas datas moi significativas para as nosas bibliotecas: Día do libro e Día das Letras Galegas. Dando así comezo a campaña promovida polas Bibliotecas Escolares: "E ti que libro salvarías?" xa estamos todos e todas pensando, falando, revisando...libros e máis libros...A SALVAR!

LÁMINAS DÍA DO LIBRO

2011-04-24T20:52:00.007+02:00

Unha das actividades que propoñemos para o 2º e 3º ciclo é a realización de láminas para a promoción da lectura, con debuxos e eslogan. Para ilustralos, déronselle de exemplos unhas láminas con debuxos sacados da internet ás que se lle engadiron lema, mascota e nome da biblioteca.

DÍA INTERNACIONAL DO LIBRO, 23 de abril

2011-04-24T20:35:00.005+02:00

Tres son as principais propostas suxeridas dende a Biblioteca: realizar ilustracións a un poema moi fermoso de Ana Mª Fernández "Porque con leres un libro, mil mundos podes achar..." ,deseñar láminas de animación a lectura a partires de modelos e campaña proposta polas Biblioteca Escolares: "Salvar un libro"

AS ESPIÑAS DO PORCO ESPIÑO

2011-04-19T21:34:00.005+02:00

Estamos a espera de recibir a visita de Abraham Carreiro. Son dous os libros que o primeiro ciclo está lendo. "As espiñas do porco espiño" e "A pel do crocodilo" dúas fermosas historias que a cegoña, mascota da colección recolleu; a primeira en Canadá nos indios chipewa e o segundo en Namibia (África). Este último danos xogo para poder contarlles ao alumnado de infantil que están traballando África no seu Proxecto anual de biblioteca.

Aquí vos deixamos actividades JavaClic de "AS espiñas do porco espiño"

A CULTURA ÁRABE

2011-04-19T21:13:00.003+02:00

Actividades LIM sobre a cultura árabe, dirixida ao alumnado do 2º ciclo.

ACTIVIDADE JAVACLIC.- ZAZUM Y EL ELEFANTE

2011-04-19T14:17:00.005+02:00

Actividade javaclic sobre o este libro, pensada para o alumnado de infantil.

ACTIVIDADE LIM .- A SORPRESA DE NANDI

2011-04-19T14:01:00.003+02:00

Sobre o libro A sorpresa de Nandi, realizouse unha actividade LIM para o alumnado de infantil. Eila aquí!

A SORPRESA DE NANDI .-CONTO NARRADO

2011-04-19T13:23:00.007+02:00

O alumnado de 2º curso puxo a voz para contarlle este conto ao alumnado de infantil. O poboado africano de Nandi, os animais que aparecen no conto e as froitas, fan referencia á cultura africana (proxecto anual de infantil).

ILUSTRAMOS DA MAN DE RODRIGO CHAO

2011-04-13T17:53:00.001+02:00

Recordamos algúns dos momentos do obradoiro.

XOA E O SEU ILUSTRADOR: RODRIGO CHAO

2011-04-13T17:43:00.003+02:00

O alumnado do 2º ciclo participou nun obradoiro de ilustración da man de Rodrigo Chao, ilustrador boirense. Este ciclo traballou previamente o libro Xoa, do que é ilustador. Amosoulles ilustracións realizadas por el, acuarelas e papel especial que emprega para o seu traballo. Logo, ensinoulles unha serie de trucos ou técnicas á hora de levar a cabo certos debuxos, insistindo na utilidade dos eixes de simetría en determinadas figuras. Lástima que, por diversas razóns, estes obradoiros non se poidan realizar máis a miúdo. Grazas Rodrigo!

ENCONTROS PLAN MELLORA 2010/2011

2011-04-09T18:29:00.005+02:00

O 7 de 8 de abril tiveron lugar os Encontros de Plan de Mellora de Biliotecas Escolares no Palacio de Congresos de Santiago de Compostela. Preto de catrocentos centros (entre eles o C.E.I.P. Cespón) de toda Galicia estiveron alí representados polos/as coordinadores/as das respectivas bibliotecas escolares. O conselleiro de Educación, Xesús Vázquez Abad, abriu o acto do segundo día e o broche final dos encontros contou co xenial e sempre entrañable escritor Xesús Neira Vilas. As súas sinxelas verbas puxeron aos oíntes en pé ao son de merecidos aplausos. Teresa Maña, Mónica Baró da Universidade catalana, o ilustrador Kiko da Silva,...intercambio de experiencias, materiais e libros con outros centros... fan que estas xornadas ano tras ano sexan de gran proveito. Grazas Pilar e Cristina pola gran labor que levades a cabo.

O MUNDO ÁRABE

2011-04-06T20:25:00.004+02:00

O alumnado do 3º ciclo segue buscando información sobre os países árabes. Realizaron un mural cos países e as súas respectivas bandeiras e buscaron determinados conceptos que plasmaron estilo cadro con ilustración.

OS/AS PEQUES DO COLE POEMANDO

2011-04-02T18:44:00.016+02:00

Este é o primeiro ano no que o alumnado de infantil está no centro. Moitos cambios. Pero, sen dúbida todos eles moi positivos. Non estabamos acostumados a ver os corredores do piso inferior ateigados de flores, bolboretas, paxariños, caracois, poemas, arcos da vella, ...todo este colorido fan que nada máis entrar alegremos a vista. NORABOA PROFES E NEN@S! Neste caso, podemos observalos en sesións de traballo adicadas á poesía. PEQUENOS, PERO... GRANDES ARTISTAS

POEMANDO EN TERCEIRO

2011-04-02T18:24:00.006+02:00

O alumnado de 3º escribiu unhas fermosas poesías. Nalgúns casos guiados por modelos de poemas coñecidos cunha estrutura sinxela; noutros casos, creación libre, pero todas elas fermosas e moi decoradas con flores e bolboretas.

FOTOGRAFÍAS DA CONTORNA

2011-04-02T18:14:00.004+02:00

E seguimos percorrendo as terras de Cespón da man de Luíña. O alumnado fotografía lugares, monumentos, cruceiros, fontes,... das súas aldeas para mostralos ao resto da comunidade educativa. Ao lado de cada fotografía, Luíña explica nun sinxelo texto de que se trata e onde está situado, e como non o nome do alumno/a que a realizou. Ánimo nenas e nenos e a por máis lugares fermosos da contorna!

MARCAPÁXINAS DÍA DA POESÍA

2011-04-02T17:59:00.003+02:00

Baixo o lema: "Un poema, unha flor" elaboráronse maracapáxinas con motivos florais, empregando tamén flores secas. Aquí podemos ver una pequena mostra:

POEMANDO NO PATIO

2011-04-01T19:15:00.006+02:00

Seguimos con actividades relacionadas coa poesía. Neste caso, é o alumnado de 2º curso o que está realizando as actividades que propuxo o Equipo da Biblioteca. Varios poemas colgados a modo de tendal nos que os nenos e nenas buscan as respostas. Xa vedes que chegou a primavera e xa o lema o dicía: "Unha poesía, unha flor". Felicitar a todos e todas, pola boa acollida que sempre tendes coas actividades que se propoñen.

PROPOSTAS PARA A POESÍA

2011-03-27T18:00:00.001+02:00

Presentamos ao alumnado distintas propostas para traballar a poesía. Aquí as podedes ver.

DÍA MUNDIAL DA POESÍA

2011-03-24T21:06:00.007+01:00

Alumnado de infantil recitou uns fermosos poemas.

TERESA GONZÁLEZ

2011-03-24T18:08:00.012+01:00

"Serafina, a filla do ladrón de bicicletas, vive coa súa tía Perfecta...Quere ser equilibrista nun circo coa súa bicicleta Celerífera ..." O alumnado do 3º ciclo recordou este libro da man da súa autora, Teresa González, que visitou a nosa Biblioteca o martes 22 de marzo. Estupendo encontro! Non perdades a oportunidade de lelo!

MÚSICA E POESÍA

2011-03-24T17:26:00.003+01:00

No Día Mundial da Poesía celebramos na biblioteca un recital de poemas, dende os peques de 3 anos ata os maiores de 6º. Algúns cursos preferiron gravar con anterioridade; outros, recitaron no momento: poemas coñecidos, inéditos... e poemas musicados: "O arco da vella" "Galicia" "O cuco" "Iste vaise" foron realizados estilo karaoke a través do programa Karafun. Unha actividade que levamos a cabo dende o curso pasado e ao alumnado resúltalle moi motivadora.

DÍA MUNDIAL DA POESÍA

2011-03-22T22:39:00.008+01:00

DÍA MUNDIAL DA POESÍA

2011-03-20T22:21:00.004+01:00

O alumnado de 5º levou a poesía ata a Biblioteca. Partindo do portal de acceso ao centro, o libro de poemas "Ventos" de Antonio García Teijeiro, foi percorrendo o patio, pasando de man en man, ata chegar á Biblioteca.

DÍA MUNDIAL DA POESÍA

2011-03-20T22:18:00.003+01:00

Recitado de poemas dos de 2º

DÍA MUNDIAL DA POESÍA

2011-03-20T22:14:00.004+01:00

As nenas e nenos de segundo recitaron poemas.

DÍA MUNDIAL DA POESÍA

2011-03-20T22:08:00.004+01:00

O alumnado de primeiro recitou dous pequenos poemas.

PEGATINA DÍA DA POESÍA

2011-03-18T22:01:00.005+01:00

Pegatina para conmemorar o Día da Poesía, con poema de Manuel María.

POEMAS NA PRIMAVERA

2011-03-11T19:27:00.011+01:00

" Ábrese un gromo,

sae unha flor.

A primavera

ole a calor.

Sol, choiva,

néboa, color

Primaveriña...

Que ledo estou"
García Teijeiro

Ao noso colexio chegou a primavera. E xa estamos preparados/as para comezar a memorizar, recitar, escribir e por que non xogar cos poemas. Preparádevos porque o 21 de marzo celebraremos o Día Mundial da poesía.

A POEMAR!

2011-03-05T17:22:00.002+01:00

Seguindo co proxecto anual da biblioteca: "Lecturas e culturas de aquí e de acolá" celebramos o entroido con disfraces acordes co tema: África, Exipto, a cultura romana e árabe déronse cita no patio do colexio. Aquí vos deixamos unha pequena mostra, se queredes ver máis fotos visitade a páxina web do centro(galería).

POESÍA ROSALIANA

2011-03-03T17:52:00.003+01:00

Mural colectivo coa vida e obra da nosa gran poetisa.

DÍA DE ROSALÍA 2011

2011-02-28T20:35:00.001+01:00

O primeiro ciclo homenaxea a Rosalía con algúns dos seus poemas.

DÍA DE ROSALÍA

2011-02-25T20:45:00.004+01:00

Para conmemorar o nacemento de Rosalía, o xoves 24 de febreiro o alumnado do 3º ciclo realizou unha actividade conxunta na biblioteca: visualizaron un vídeo sobre Rosalía, cantaron "Iste vaise i aquel vaise" musicado por Fuxan os ventos e "Adiós ríos, adiós fontes" musicado por Amancio Prado. Para rematar unha alumna de 5º recitou o anterior poema.

CONTACONTOS: GATO GUILLE E OS MONSTROS

2011-02-22T22:13:00.003+01:00

Un grupo de alumnos e alumnas de 5º de primaria: Jorge, Carlos, Lorena e Bea, escenificaron o conto "Gato Guille e os monstros" para o alumnado de infantil e o primeiro ciclo.

DÍA DE ROSALÍA

2011-02-22T00:13:00.007+01:00

O alumnado do 3º ciclo está realizando diversos traballos para conmemorar o nacemento de Rosalía de Castro. Aquí podedes observar un mural colectivo sobre vida e obra desta gran poetisa galega.

A ESCOLA NA CULTURA ROMANA

2011-02-18T20:55:00.006+01:00

Os números romanos, os útiles escolares: estiletes, tablillas enceradas...é parte do traballo que o 2º ciclo está levando a cabo na súa investigación sobre a cultura do antigo Imperio romano.

TERCEIRO CICLO E A CULTURA ÁRABE

2011-02-18T20:34:00.003+01:00

Debuxos de hamsas, réplicas de haimas, ... pero sobre todo, busca de moita información: modo de vida, vestimenta, o papel da muller, o Islam...

INFANTIL VIAXA A ÁFRICA

2011-02-18T20:17:00.004+01:00

INCRIBLE! As aulas e os corredores de infantil cada día aparecen con máis colorido. O alumnado da man das súas profes recrean instrumentos musicais, xentes, vivendas, máscaras...da cultura africana. Mirade, canta arte!

O 1º CICLO INVESTIGA OS MISTERIOS DE EXIPTO

2011-02-18T20:08:00.002+01:00

O alumnado do 1º ciclo segue coas súas investigacións sobre a cultura exipcia. Pirámides, faraóns, deuses e deusas, papiros, sarcófagos...

2011-02-14T19:25:00.003+01:00

O alumnado de infantil e primeiro ciclo de primaria participan nunha sesión de contacontos na biblioteca do centro.

NOVOS FONDOS MUSICAIS

2011-02-02T18:57:00.003+01:00

Ano novo, fondos novos. Aproveita a hora de lectura para coñecer novos libros, novos Cd,s de música e películas que incorporaremos xa os fondos da biblioteca. Outras novidades están circulando nas mochilas viaxeiras. Dedícalle parte do teu tempo. Paga a pena.

DÍA DA PAZ

2011-02-02T18:44:00.003+01:00

O venres reunímonos na biblioteca do centro para celebrar o día da Paz. Recordamos a figura de Ghandi e tamén falamos de Wangari Maathai, premio Nobel no 2004. Desta última oímos o conto narrado por alumnos e alumnas dos distintos cursos: "Wangari e as árbores da paz. Logo cantamos varias cancións: "No dudaría" de Antonio Flores; "Más allá" de Gloria Stefan; "Que canten los niños" de Perales; "Rosa de la paz" de Amaral: "Quítame ese velo" e "Africanos en Madrid " de Cómplices. Como broche final e seguindo co Proxecto Anual da Biblioteca cantamos "Hakuna Matata" facendo un guiño á cultura africana que estamos a traballar en infantil.

WANGARI E AS ÁRBORES DA PAZ

2011-01-27T21:57:00.003+01:00

A partir das imaxes do conto do mesmo título, o alumnado dos diversos cursos foi poñendo as súas voces ás distintas ilustracións.

A CULTURA EXIPCIA

2011-01-20T22:13:00.002+01:00

O 1º ciclo está a traballar a cultura exipcia. Velaquí unha presentación. Na páxina web do centro dentro de aula virtual están as actividades LIM. A TRABALLAR!

View more presentations from Fiz.

PAZ, XANEIRO 2010

2011-01-19T17:02:00.009+01:00

O alumnado do noso centro segue unindo esforzos e ideas para levar a cabo diversas e variadas tarefas. Neste caso, o alumnado de 5º plasma as súas ideas sobra A PAZ

DEUSES E DEUSAS EXIPCIAS

2011-01-16T19:13:00.002+01:00

No noso percorrido polas culturas, seguimos en Exipto. Nesta ocasión cun sinxelo vídeo e unha presentación de deusas e deuses.

O EXIPTO DOS FARAÓNS

2011-01-16T18:58:00.002+01:00

O 1º ciclo prepárase para entrar nos misterios do Antigo Exipto. Comezamos coñecendo aos seus faraóns, raíñas...

CONTACONTOS

2011-01-15T12:22:00.004+01:00

O alumnado de 5º de primaria representou para os alumnos e alumnas de infantil o conto: "A tarta de cereixa" coa axuda de títeres. Distintos personaxes: cabra, porco, formiga, vaca, ...tiñan que levar unha tarta á ovella.