ENTROIDO
O venres 28 de febreiro celebramos o entroido no centro, despois de seguir ao longo da semana os mandados do Meco, chegou o momento de disfrazarse. Coma nos últimos anos seguimos a temática do proxecto anual da biblioteca: "Viaxando atrás no tempo".
Despois de degustar os doces aportados polas familias, fixemos un desfile e desfrutamos do baile e da música.
Como remate de festa queimamos o Meco, non sen antes ler o seu xuízo e testamento.
DÍA DA PAZ
O 30 de xaneiro celebramos o día da Paz cunha carreira solidaria, na que os participantes aportaron un alimento para logo donalo a Cáritas.
Nesta carreira distinguíronse varias categorías atendendo á idade: infantil, 1º ciclo, 2º ciclo, 3º ciclo e adultos; tanto persoal do centro como familias. Agradecemos, especialmente, os pais e nais que nos acompañaron.
Ao rematar, a cada alumno/a fíxoselle entrega dun colgante conmemorativo do día.
DÍA DE CASTELAO
O alumnado de 5º e 6º compuxo unhas regueifas sobre a obra e a vida de Castelao, aproveitando un obradoiro que Lupe Blanco veu impartir ao cole. De entre todas, seleccionaron algunhas que ensinaron a cantar ao resto dos compañeiros.
E o día 30 de xaneiro, aniversario do nacemento de Castelao, regueifamos todos xuntos na súa honra.
CELEBRAMOS O NADAL NO COLE
O primeiro trimestre chegou ao seu fin coa celebración de Nadal, para iso desfrutamos cun baile que prepararon alumnas de 6ºcurso e dunha obra de teatro.
A continuación cantamos todos xuntos a panxoliña " Xa me tardan" de Mamá Cabra e celebramos as badaladas con gusanitos e o correspondente brinde polo 2025.
